【地道式劇透】《人中之龍6 生命詩篇。》第七章-黑孩子
December 11, 2016 Share

【地道式劇透】《人中之龍6 生命詩篇。》第七章-黑孩子

係警方黎到調查達川既同時,本庄條死人頭又係到老屈桐生有殺人動機,但明明桐生既拳頭從來都殺唔死既人,所以伊達都認真推測可能既祭汪會既人,但本庄條友連伊達話埋一份……

其後桐生同兩位小弟相約好係新瑟雷娜等,正當想上去之際,阿城條MK仔突然趕到,迫住桐生抽少少時間去咖啡店傾下,講到話係相熟店家,但都係比JUSTIS班人知道,對白又係好公式化話想打佢就慢慢一個個頭目咁打贏先啦,的確又係類似玩經營不動產既野。

但係吹完水之後真係無時間同班MK仔玩住,依家都係去左新瑟雷娜先,廢事要大家等咁耐,而新瑟雷娜個老闆娘都係伊達個老婆,所以南雲都話自己好彩無調戲到佢,到人齊就一齊傾下,伊達話依家要幫遙轉醫院,但希望桐生唔好去探佢住,唔係就搵唔到醫院比佢,最後桐生決定要搵開頭交過手既艾德問出達川既死因。

入去搵艾德之前,當然要搵一搵秋山,不過秋山已經唔再係下水道到,而下水道都有祭汪會既人捕住,解決過後,果位街友都話依家要經過幾條友先可以聯絡到佢,類似六度分隔理論,可能因為比人跟得太密既關係先要咁小心,而離開果陣原先入口比人封左,逼住改由另一邊出,出去之後無幾耐就收到秋山既電話,約好係酒店到見面,但再提醒桐生小心比人跟蹤。

去到酒店門口既時候,桐生就發現比一班人跟蹤,行到一二邊砌低佢地之後就發現係東城會既人,其後上到酒店6樓之後,發現有間房既房門係開住,暗示桐生進入,結果秋山再次以街友造型現身,仲要扮成抹窗工人咁係出面入黎,除此之外,一開頭比桐生救左一命既新仔室田都係到,解釋目前東城會同祭汪會既情況,隨後說明兩個黑幫本來係扮鬥爭,實際上不知不覺咁「假戲真做」,特別提醒仲桐生要小心菅井同染谷。

同秋山約好係亞細亞街再行動既時候,都係時候返去新塞雷娜搵兩位小弟,而南雲都借酒澆愁,飲左成50萬酒,但既然要艾德問個清楚達川既事,所以南雲都即刻醒晒,可以出發去亞細亞街到搵秋山。

不過秋山真係好保險,希望桐生唔好跟得佢太近,跟到入條後巷之後,總算可以講潛入計劃,就係再次戴上頭套,先由桐生同秋山上到天台,再放條梯等南雲同勇太上去,最後由3樓既窗戶潛入艾德既鋪頭。

不過潛入就唔算難,唯獨係一個叫「曹」既人好似《人中0》既米田咁煩,會不出現拎鬼住把豬肉刀出黎突襲,最後大家到達艾德既地頭又有一堆人等住打。

最後總算殺到入去搵艾德,不過佢直接承認左達川係佢殺,因為「黑孩子」出生既達川背叛左祭汪會,自自然然要執行「家法」,而「黑孩子」即係一孩政策下,無戶籍走左黎日本既細路,隨後緊係唔講咁多野,打左再算啦。

而單挑打到咁上下,艾德除左爆氣之外,當然仲會吹雞,呢個時候,南雲班人就會從天而降幫幫手,而打完之後,大煩人舛添又出現,今次槍都帶埋,但之前以陽銘聯合會身份出現既佢,今次就直接就話自己本身就係祭汪會既人。

但講左一陣之後,一個相貌有少少似黃秋生既男人出現,呢個人就係香港(?)祭汪會既總帥-郎老大,佢一望望呢四個人之後就命令舛添放低槍,之後就希望建立互惠既關係,就約左桐生第二日去桃源鄉單獨見面。

當返到新塞雷娜之後,秋山猜測舛添其實係好人,因為拎槍都無射到佢地,反而仲放過佢地,而勇太因為識普通話關係,聽到郎老大同舛添密密針既對話,係廣島既尾道有著絕對唔見得光既秘密,到底有咩秘密,同埋桐生見到郎老大又有咩特別野傾呢?

【待續】

下一章:共謀