【地道式劇透】《人中之龍6 生命詩篇。》第八章-共謀
December 11, 2016 Share

【地道式劇透】《人中之龍6 生命詩篇。》第八章-共謀

續上回,桐生比祭汪會大佬郎老大相約係桃源鄉單獨見面,但畫面一轉就係有人講錯野得罪染谷比佢爆樽走人,而激到染谷既內容相信係講左桐生既壞話。

而第二日當桐生計劃既時候,染谷又神出鬼沒咁出現左係新瑟雷娜到,仲踢爆南雲當日真係走左去獨食沖涼……不過突然好有禮貌咁尊稱桐生做「第四代會長」,其實係希望桐生可以同佢聯手,帶埋佢搵郎老大,桐生就答應左。

身邊既人當然都唔明白桐生既決定,畢竟染谷個人都係奸,之前見面都講明要提防佢,桐生就解釋個目的,話狂犬與其放養,倒不如直接係隔離睇住比較好,秋山一點就明,即時都悟出左大道理,於是準備好之後就可以等到夜晚準備又黎漫長戰鬥。

到約定時間果陣,染谷又真係出現返,邊行邊話郎老大唔似有心想真係傾,因為揀既地方係已經沒落又殘舊既桃源鄉,的確一到步果陣染谷又再話都係當初有人揸架油罐車係到搞破壞先今日呢個景況,而呢件事自然都係第一集真島搞既事黎。

入面好似天災洗劫過後既桃園鄉有一大班人等住打,不過染谷會幫下手,唔大問題,只係要小心中間出現兩次既蒙面痴線佬就得,而路障記得要執道具黎打爆佢,殺到最入就就會發現郎老大係到等緊兩位。

呢個時候,染谷就攞槍出黎希望桐生幫手活捉郎老大,但桐生就突然企出黎話因為當正自己粒仔一樣既堂島大吾比佢搞到入冊,點都要向搞自己家人既人報仇,於是染谷都掉左手上既槍,堂堂正正同桐生開拖,而郎老大企定定係到食花生就算。

打完之後,染谷都只求一死,而郎老大希望桐生交比佢處理,隨後郎老大都交代成件事既發展,話殺自己個仔,即吉米‧郎既幕後黑手其實係巖見恒雄,而染谷同菅井都係有巖見恒雄做靠山先敢出聲,所以無殺既價值,反而希望染谷執返條命幫手向巖見恒雄傳個話當報恩。

郎老大同時亦表明,遙人既生父一定唔係大眾臉既達川,但真正生父就迫桐生入會效忠佢先講,同埋講明遙人呢個BB仔對爆發衝突有重大價值,係呢個時候,桐生既電話都響起左,得知道廣瀨老爹帶走遙人既消息,到底老爹既目的又係咩呢?

【待續】

下一章:失蹤